عزيزي محمد صلاح.. أنت مبتتعبش!

كتب : محمد عمارة

الإثنين، 28 فبراير 2022 07:23 م

مشاركه

"بسم الله ما شاء الله والله أكبر" قبل أي حاجة.. بس حقيقي أنا أقصد العنوان بكل معانيه وتفاصيله.. لأن ببساطة دي حاجة إعجازية تقريبا مبتشوفهاش إلا نادرا خاصة لما تشوفها بنفس الجودة العالية دي وخاصة أكتر أنها من لاعب مصري وكان بيلعب في الدوري المصري !

الحقيقة أن محمد صلاح نفسه بقى متعب جدا لأي شخص بيحاول يجاري أرقامه اللي بيحققها كل يوم والأرقام اللي بيحطمها ساعة ورا التانية لدرجة خلت ردة فعلك على أي رقم بيكسره صلاح "عادي يعني.. ايه الجديد"!

طب ايه الجديد فعلا.. الجديد هذا الرقم المرعب بالنسبة لي في السطور القادمة.

لك أن تتخيل يا عزيزي أن محمد صلاح في 32 يوم لعب تقريبا 1000 دقيقة (991 دقيقة بالتمام والكمال).. يعني 10 مباريات.. أساسي منهم في 9.. 5 من الـ9 كانوا (120 دقيقة مش 90).. يعني تقريبا 250 دقيقة في الأسبوع.. يعني معدل 2.8 مباراة في الأسبوع وده على مدار شهر.. وإجمالا ومنذ بداية كأس الأمم الإفريقية وحتى اللحظة الحالية.. (يعني47 يوم).. وصل صلاح لـ 1261 دقيقة متتالية.

صلاح في الـ1000 دقيقة دول.. سجل هدف أمام الإنتر في السان سيرو.. وسجل 3 أهداف في البريميرليج وصنع هدف.. وسجل هدف وصنع آخر في كأس الأمم.. (5 أهداف وأسيستين)
صلاح لسه عنده 3 مباريات في الدوري (وست هام ثم برايتون ثم مانشستر يونايتد) هيتخللهم مباراة العودة أمام الإنتر في أنفيلد وهذا بعيدا عن مباراة الأربعاء أمام نوريتش في دور الـ16 في كأس الاتحاد الإنجليزي اللي ربما تكون الراحة الوحيدة له قبل مباراتي مصر والسنغال... يعني تقريبا بتكلم في 360 دقيقة في 20 يوم.. عقبال ما يرجع صلاح لمواجهة ماني وميندي من جديد وهذه المرة لتحقيق حلم المونديال الذي يتعلق به آمال أكثر من 100 مليون مواطن مصري.

فبكل فخر.. معنديش غير كل تقدير وإشادة ومحبة ودهشة لهذا النجم المصري الذي كسر كل قواعد الإجهاد وضغط المباريات التي يعاني منها كل لاعبي مصر.. ولذلك..
عزيزي محمد صلاح.. أنت بشر وبتتعب ووصلت لأكثر مما حلم أي مصري في كرة القدم وباكتساح.. احنا بس مش مصدقين أن عندنا لاعب مصري زيك.. بس إصرارك وعزيمتك ومجهودك المستمر وعقليتك الحديدية.. هتخلينا دايما "عشمنا فيك أكبر من أي حاجة"!.. نشوفك على خير يا أبو صلاح.