اخبار كوره بلاس

"متخافوش من كأس الأمم.. احنا معانا محمد صلاح"

كتب : محمد عمارة

الإثنين، 10 يناير 2022 03:51 م

مشاركه

11 سنة بالتمام والكمال.. 11 سنة فاتت على آخر تتويج لمنتخب مصر بكأس الأمم الإفريقية 2010 اللي كانت في أنجولا واللي كتبت نهاية الجيل الذهبي للفراعنة مع المعلم حسن شحاتة واللي من ساعتها برضه لحد دلوقتي مش عارفين نرجع هيبة منتخب مصر في افريقيا.. الهيبة اللي كانت بتخوف أي منتخب أيا كان هو مين.. الهيبة اللي خلتنا ناخد 3 كاس امم ورا بعض ونعمل الرقم القياسي سواء بهاتريك البطولات أو بالأكثر تتويجا في افريقيا بـ 7 بطولات.

ومن 2010 لحد بطولة الكاميرون الحالية اللي في 2022.. اتلعبت 5 نسخ من كاس الامم.. وزي ما عملنا رقم قياسي مع حسن شحاتة في التتويج بالبطولة 3 مرات ورا بعض.. جه الزمن علينا أننا نعدي 3 نسخ من كاس الأمم من غير ما نشارك فيهم في سابقة حصلت لأول مرة في تاريخ الفراعنة.. وبعدين جات مشاركتنا في بطولة الجابون 2017 واللي وصلنا فيها للنهائي وخسرناه قدام الكاميرون مع "الله يمسيه بكل خير" هيكتور كوبر اللي وصلنا كاس العالم لأول مرة في تاريخنا من 30 سنة.. وأخيرا وليس آخرا.. جات البطولة المنتظرة.. كاس الامم الافريقية 2019 اللي اتلعبت على أرض مصر واللي اتعشمنا فيها كلنا بذكريات 2006 بأجوائها وحلاوتها اللي كانت بداية كل خير للكرة المصرية.. بس للآسف "مش كل المطالب بالتمني".. المطالب بتبقى بالعرق والجهد والاصرار والعزيمة والروح والالتزام.. حجات كلها تقريبا افتقدناها في كاس الامم 2019 اللي احنا استضافناها واللي خلتنا نخرج من دور الـ16 قدام منتخب "الأولاد" جنوب إفريقيا بـ"فضيحة مدوية" اللي خلصت على مشوار المكسيكي خافيير أجييري مع مصر.

ولك أن تتخيل يا عزيزي أن على مدار رحلة الـ10 سنين اللي فاتوا.. اللي هما تقريبا بيشكلوا ربما "أفشل" حقبة في تاريخ مشاركات مصر بكأس الأمم.. احنا كان معانا واحد من أفضل 3 لاعيبه في العالم في آخر تصنيف لفيفا في جائزة "ذا بيست" لعام 2021.. محمد صلاح.. صلاح اللي بدأ مشواره الدولي مع منتخب مصر في سبتمبر 2011 لما كان عنده 19 سنة.. معرفش يشارك مع المنتخب لا في كاس الامم 2012 ولا 2013 ولا 2015.. ورغم أن صلاح كان لاعب في تشيلسي في 2014 في صفقة تاريخية وقتها بـ11 مليون جنيه إسترليني.. إلا أن العزاء وقتها كان أن صلاح لسه صغير ويدوب عنده 23 سنة ولسه بيبدأ مشواره الاحترافي التاريخي.

طب 2017؟.. وصلنا للنهائي وكنا قريبين أوي أننا ناخد البطولة وصلاح كان ساعتها "عامل فوق الصح وزيادة" لأنه كان لسه موصلنا كاس العالم 2018 لأول مرة من 30 سنة في حدث نادر الحدوث على الشعب المصري رغم أنه كان لسه لاعب في روما بيثبت أقدامه كواحد من نجوم الدوري الإيطالي في الوقت ده..

أما 2019 بقى.. فمكنش حد له "حجة" في منتخب مصر.. وصلاح كان وقتها بطل دوري أبطال اوروبا مع ليفربول وأفضل لاعب في افريقيا وهداف الدوري الإنجليزي سنتين ورا بعض وقصة كبيرة أوي كلنا عارفينها....

نيجي لـ2022 اللي بتتلعب فيها نسخة 2021 لظروف احنا عارفينها كلنا.. ولو فاكر أن صلاح في 2019 كان "عالمي" و"مكنش فيه احسن من كده" عشان يقودنا للتتويج بكاس الامم اللي بتتلعب على أرضنا وزي ما بنقول "مفيش احسن من كده بقى".. فتخيل حضرتك أن صلاح بقى "عالمي أكتر" و"طلع فيه أحسن من كده".. لأن صلاح اللي من 3 سنين بقى غير صلاح دلوقتي.. لأن صلاح دلوقتي هو "حرفيا" من أفضل 3 لاعيبه في العالم بشهادة معتمدة ومختومة من الاتحاد الدولي لكرة القدم لدرجة أن في تضارب كبير من ياخد جائزة أفضل لاعب في العالم 2021.. يا ترى ميسي ولا ليفاندوفسكي ولا محمد صلاح.. "آه والله"...

فـ المهم بقى.. هل يعقل أن مسيرة صلاح دي.. بكل إنجازاته التاريخية وأرقامه القياسية وبطولاته العالمية.. مياخدش مع منتخب مصر كاس الامم.. كاس الامم اللي كنا في وقت من الأوقات "زهقنا" من كتر ما خدناها وكان حصلنا حالة من "التشبع" منها.. صلاح اللي خلى ليفربول ياخد البريميرليج لأول مرة في تاريخه من 30 سنة برضه.. صلاح اللي عمل ملحمة أوروبية عالمية توج بيها مع ليفربول باللقب الأغلى والأقوى والأعلى في أوروبا كلها دوري أبطال أوروبا.. صلاح هداف الدوري الإنجليزي ومكتسح الأرقام القياسية في ليفربول وفي إنجلترا عموما.. صلاح اللي وصلنا كاس العالم اللي بنوصله كل 30 سنة مرة.. مش عارف ياخد معانا كاس الامم.... معقولة !!!

طيب خلينا نتفائل بـ كارلوس كيروش.. خلينا نتفائل بروح المنتخب اللي شفناها في كاس العرب.. خلينا نتفائل بالجيل اللي قوامه الرئيسي كان مساهم في أبرز حدث حصل للكرة المصرية في آخر 30 سنة.. خلينا نتفائل برسالة محمد صلاح الأخيرة قبل البطولة.. الرسالة البسيطة المعبرة.. الرسالة الواضحة الصريحة.. الرسالة اللي بنقولها كلنا.. "الطريق مش سهل بس احنا هنحارب علشان نرجع بالكاس. خليكوا في ظهرنا".. بس خلي بالك يا كيروش.. خلي بالكوا يا رجالة منتخب مصر.. زي ما احنا "متعلقين في رقبة محمد صلاح".. ذنب محمد صلاح هيبقى في "رقبة" المنتخب لو أنهى مسيرته الكروية مع منتخب مصر من غير ما يحقق كاس الامم!!